حوادث وقضايادنيا ودينعالم الفن

انتقادات شديدة لمسلسل ملوك الجدعنة..

كتبت جيهان إبراهيم

بشكل شخصي تابعت مقطفات ولقطات ومشاهد مختلفة ومقدرتش استمر الحقيقة لأنه صعب عليا فعلا اتابع حاجة زي كدا تجذبني او تشدني خصوصا اني مش غاوي مسلسلات او افلام عموما غير قليل جدا
لكن شايف ردود فعل قوية جدا ع المسلسل ع السوشيال ميديا
وبقيت محتار هل أصبح شباب الجيل الحالي مواليد التسعينات والألفينات في مصر
مبهورين بالنوعية دي م المسلسلات وشايفين قدوتهم في الشخصيات دي !!

وبنات التسعينات والألفينات هل طالعين شايفين الشخصيات دي هي ال شداهم ويتمنوا يتجوزوا واحد بالمنظر دا !!

يعني الحقيقة الي انا شوفته انه محتوي بيقدم الحشيش والسلاح الابيض والخمور والزنا ع انه جدعنة ومرجلة
الحقيقة استغربت ع اسم المسلسل لأنه المفروض كان يتسمي ملوك البلطجة او السرسجة او اي حاجة تانية

هل هي دي بقت الجدعنة في مصر من وجهة نظر شباب دلوقت

يعني هل الاجيال السابقة معرفتش تربي او تعلم فبالتالي طلعتلنا جيلين جداد بقت البلطجة والزنا والصياعة والمخدرات قدوتهم ؟؟

هو ممكن بالمنظر الي احنا شايفينه دا الاجيال الي طالعه وعاشقة للشخصيات دي ممكن تبني دولة او تساهم في تطور بلد !!

الانبهار الي انا شايفه دا مؤشر مرعب ع الي هيحصل في المستقبل وأن هيبقي شعب همجي فاسد بعد كام سنة من دلوقت
المصيبة لو الاجيال دي خلفت كمان هيطلعولنا مناظر عامله ازاي !!

يعني البنات بقي فتي احلامها الشاب الي بيلبس سلسلة في رقبته زي النسوان وانسيال ف ايده وبيلف سجارة الحشيش وحاتط مطوه ف جيبه وماسك ازازه ال ID في ايده !!

والشباب بقي قدوتهم الزنا والصياعة والمخدرات !!

يعني مش كفاية ان الدولة سايبه الحشاشين والبلطجية وبتوع الخمرة والحرامية والمغتصبين في الشوارع وعمالين يزيدوا كل سنة عن الي قبلها
لأ بقي الناس الي في البيوت نفسها حابه كدا وبتأيد كدا

كمية ايحاءات جنسية وألفاظ بذيئة غير عادية بقينا نسمعها في الشوارع

ويطلع البطل يقولك اصل احنا بنقدم رسالك وهدف سامي وبننقل الي ع الارض الواقع

هو الرسالك انك تقدم افساد واسفاف ولا انك تعمل عمل يوعي الناس والاهالي الضايعة والشباب الضايع وتعرفهم الصح م الغلط !!

دا حتي مفيش دور للرقابة تمنع عمل زي دا وقبل منهم محمد رمضان طبعا بأعماله الخرافية الهادفة

كمية محرمات بتتقدم في المسلسل دا وغيره في السنوات الاخيرة غير طبيعية

يعني انا شايف لو فتحت التوراة او الانجيل او القرآن
هتلاقيهم كلهم بيحرموا البلطجة والسرقة والزنا والخمر والسباب والشتم وغيره وغيره

طب والجيل الحالي المبهور بعمل زي دا ديانته ايه محتاج افهم ؟؟
طب الاهالي المسئولة عن الاجيال دي ديانتها ايه عاوز افهم برضو ؟؟

دا لو ديانة بوذية او سيخية او هندوسية او زرادشتية وقرأت فيها هتلاقيها برضو بتبذ الامور دي

اي شاب تيجي تتكلم معاه دلوقت تلاقيه عاوج بوقه ويقولك ياسطااااا وصباح الخير يا ابن كذا وكذا

اي بنت طالعه دلوقت تلاقيها نايمة في سريرها طول الوقت بموبايلها وامها زي الشغالة عندها وهي مبتعملش حاجة غير الميك اب والموضة والشوزة الجديدة والدلع والمياعة وعاوزة ثري عربي يصرف عليها وهي في سريرها وبس

يعني لا فيه دور للدولة ولا دور للشعب والمجتمع من خراب لخراب..

مقالات ذات صلة

زر الذهاب إلى الأعلى
%d مدونون معجبون بهذه: